BAGUIO CITY – Insingasing ni Police Regional Office – Cordillera Regional Director PCSupt. Rolando Nana ti panakaikabil ti ‘color coding’ kadagiti amin a barangay sadiay Itogon, Benguet para iti panakabigbig dagiti napeggad unay a disso.
Sigun kenkuana, maaramat ti nasao a ‘color coding’ iti panagsagana para iti aniaman a kalamidad nangruna iti implementasyon ti preemptive evacuation ken forced evacuation.
Kinunana a babaen iti daytoy ket mapapartak ti panagbakwit dagiti pamilya nga addaan babbalay a posible a maapektaran iti aniaman a panagreggaay ti daga ken panaglayos.
Agtultuloy met ti panag-apelada kadagiti umili iti itogon para iti panakikaykaysa dagitoy iti aniaman a pammilin para iti pagsayaatanda ken tapnu maliklikan ti aniaman nga insidente a pakapukawan ti biag.
Kagiddan iti daytoy, agtultuloy latta ti Oplan Tangguyob ti pulisya tapnu impormaran dagiti maseknan nga umili ti munisipyo.
