BAGUIO CITY – Isagsaganan ti Federation of Jeepney Operators and Drivers Association iti Baguio-Benguet ti petition paper dagitoy para iti panakailaylayon ti naituding a June 30,2020 a deadline iti panagtungpal dagiti parapubliko iti PUV Modernization Program ti gobyerno.
Iti panakiyuman ti Bombo Radyo Baguio kenni Patricio Evangelista, presidente ti nasao a grupo, kinunana a sakbay pay ti panagkaro ti COVID-19 ket inaklondan a marigatanda nga agtungpal iti naituding a deadline.
Innayonna nga ita a naideklaran ti state of public health emergency gapu iti COVID-19 pandemic ket ad-adda a marigatan dagitoy.
Gapu iti daytoy, tarigagayda a kiddawen kenni Presidente Duterte ken dagiti maseknan nga opisyales ti panangikonsidera dagitoy iti posisyonda para iti panakailaylayon ti deadline iti panagsurot dagiti parapubliko a lugan iti PUV Modernization Program.
