Nangipaay ti Malacañang iti P20 million sadiay Atok, Benguet kalpasan dagiti napasamak a didigra a kas iti habagat ken bagyo.
Iti pannakiuman ti Bombo Radyo Baguio kenni Franklin Smith Mayor iti Atok, Benguet, kinunana nga agpaspasalamat daytoy kadagiti Municipal Disaster Risk Reduction Management Office agsipudta dagus dagitoy nga in-report dagiti napalpalabas a didigra a napasaran ti nasao a munisipyo.
Naipaay ti P20 million iti nasao a lugar babaen iti bangko ken sertipakasyon a mangpakpakita a naitted daytoy.
Impaganetget ni Mayor Smith nga agayabda iti panagtaripnong kadwa ti Municipal Disaster Risk Reduction Management tapno kitaenda ti kangrunaan nga aramidenda a proyekto.
Makikoordinar metlaeng daytoy iti Office of Civil Defense – Regional Office (OCD), Technical working groups, Engineering Office ken Civil Society Organization tapno napintas ti resulta ti proyekto.
Maipalagip nga immuna nga imbilin ni President Ferdinand Marcos Jr. kadagiti benipisyaryo nga aramatenda a nasayaat ti pondo ken kitaenda tapno saan a substandard dagiti maaramid a proyekto. //Bombo Syra Calion
