BAGUIO CITY – Nangrugin ti panagawid iti nagtaudanda a probinsia dagiti estudyante ken transient residents wenno dagiti agtatrabaho iti hotel and restaurant industry a napupuk ditoy Baguio City kasaruno ti panakaideklara ti Enhanced Community Quarantine iti entero a Luzon.
Pinapartak ti local government unit (LGU) ti Baguio ti koordinasyonna kadagiti LGUs dagiti nagtaudan a lugar dagiti nasao nga estudyante ken transient residents para iti panagawid dagitoy iti kabiitan a panawen.
Naamuan a nangipatuloden ti provincial government ti La Union kadagiti bus a nangsukon kadagiti dumanon 100 a residente ti La Union a napupuk ditoy siudad bayat nga iti datus ti Baguio LGU ket dumanon iti 600 a napupuk a residente ti La Union ti nagpalista a kayatda ti agawid.
Karit met ita ti sangsangwen dagiti dumanon 3,000 nga indibidual a kayatda ti agawid sadiay Pangasinan gaputa manarimaan paylaeng ti koordinasyon ti Baguio LGU iti maseknan nga LGU sadiay.
Impeksa metlaeng dagiti sumagmamano a residente manipud Isabela, Nueva Viscaya, Tarlac ken Manila ti tarigagay dagitoy a makaawid iti lugarda bayat nga agtultuloy ti koordinasyon ti Baguio LGU kadagiti gobernador dagiti probinsia iti Cordillera para iti kaskenan nga addang kadagiti estudyante ken residente dagitoy a napupuk ita ditoy siudad.
Kabayatanna, impaayan met ti LGU ti La Trinidad, Benguet iti libre a pagluganan nga agawid dagiti dumanon 200 nga estudyante a napupuk sadiay, partikular dagiti estudyante a nagtaud sadiay Tuba, Kibungan ken Kapangan.
