BAGUIO CITY– Dumanonen iti agarup 50 ti bilang dagiti aplikasyon dagiti interesado nga agpasyar ditoy Baguio ti naawat ti City Tourism Office sakbay pay ti naituding a panaglukat ti Baguio kadagiti turista manipud Region 1 wenno Ilocos Region para iti tourim bubble.
Sigun kenni City Tourism Officer Alec Mapalo, iti agdama ket nakaawatdan iti 47 a travel requests a bukbuklen ti 29 manipud Ilocos Region a sinaruno ti 13 manipud National Capital Region (NCR) ken lima manipud iti dadduma a rehiyon.
Nupay kasta, linawlawaganna a dagiti laeng aplikasyon manipud Ilocos Region ti as-asikasuenda bayat nga inimpormaranda dagiti nagaplikar manipud dadduma a rehion a saan pay nga agawat ti siudad kadagiti turista manipud iti lugar dagitoy.
Dinakamatna nga adda metten ti 398 nga user account registrations manipud naiyusuat ti Baguio VISITA online registration platform.
Innayonna a nabaelan dagiti tour operators a nakadisenyo ti tour programs a pakaitampokan ti naisangsangayan a highland experience, nangruna dagiti natural assets ti lokalidad ken ti local culture malaksid iti maipampannakkel a kinalammiis ti siudad.
Sigun kenni Mapalo, 15 nga accredited travel and tour agencies in Baguio City ti mangididiaya kadagiti tour packages bayat nga 82 nga accommodation establishments ti nakasagana a mangakomodar kadagiti turista manipud Region 1 a mapalubusan a sumrek ditoy siudad inton Huwebes, October 1.
(manipud iti PIO-Baguio)
