BAGUIO CITY–Ngimamato ti bilang ti kaso ti uram a nailista iti munisipyo ti La Trinidad, Benguet idi tawen 2020 wenno kabayatan ti pandemya nu idilig idi tawen 2019.
Iti interview ti Bombo Radyo Baguio ken Sr. Inspector Victor Sayapen Jr., Municipal Fire Protection Marshal ti La Trinidad, kinunana a nakailista dagitoy iti 39 a kaso ti uram idi tawen 2020 nangatngato nu idilig iti 32 a nailista idi tawen 2019.
Dinkamatna a dumanon iti P1.75-M ti pakabuklan a gatad dagiti nadadael kadagiti nauram idi tawen 2019 bayat nga dumanon met iti P8-M idi napalabas a tawen.
Innayunna a kadawyan a resrespondeanda nga uram ket structural ken forest fire
Mainaig iti dayta, inaklonna a maysa a parikotda sadiay ket iti forest fire wenno uram iti kabakiran
Gapu iti daytoy, immapela ni Sayapen kadagiti barangay officials ti La Trinidad iti panakitinulongda tunggal adda ti mapasamak uram nangruna ta saan pay nga umdas ti kagaawanda a mangsebseb iti kanito nga adda iti mapasamak a forest fire.
Kiniddawna pay ti panagridam dagiti umili kadagiti posible a pagtataudan dagiti uram nangruna ta agin-innasideg dagiti babbalay sadiay La Trinidad.
