BAGUIO CITY – Agtultuloy a maag-agasan iti ospital ti maysa a mannalon kalpasan a napaltogan sadiay Sitio Nagsayangan, Barangay Tagodtod, Lagangilang, Abra idi rabii.
Nabigbig ti biktima a ni Arnold Badeng Respicio, 36-anyos bayat a ti suspek ket ni Glenford Badeng Respicio, 30-anyos, agpada a residente iti nasao a lugar.
Maibasar iti imbestigasyon, ag-iinom ti biktima ken ti suspek idi nalagip da ti sigud nga argumento dagitoy.
Killaat lattan a pinaltogan ti suspek ti biktima babaen iti homemade 12 gauge shot gun.
Gapu iti daytoy, nagsagrap ti biktima iti sugat iti kaniggid a rupana.
Naitaray met daytoy iti Abra Provincial Hospital babaen kadagiti nagresponde a personnel ti Lagangilang MPS.
Adda metten ti suspek iti kustodiya ti pulisya para iti panakaipila ti kaskenan a kaso kontra kenkuana.
