Kukuwestionaran ni Senador Raffy Tulfo ti listaan nga inted kenkuana ti Philippine Charity Sweepstakes Office (PCSO) pakairamanan ti lotto games, tax records ken nagan dagiti jackpot winners.
Naklaat ken nasdaaw ti senador idi nakitana iti listaan nga adda ti maysa nga indibidual a nangabak ti namin dua pulo a daras iti uneg laeng ti maysa a bulan.
Nalabit nga agkanagnagan laeng dagitoy ngem ad-adda a nagduadua ti senador idi naammoanna nga agpapada ti napangabakan a premyo ti nasao a bettor.
Malaksid pay iti daytoy, namin ado a daras a nangabak ti bettor iti four-digit draw ken two-digit draw iti uneg laeng ti maysa a bulan.
Saan met a dinakamat ni Tulfo ti partikular nga ay-ayam a pinasetan ti nasao a bettor ken ti nagan daytoy para iti seguridad.
Kabayatanna, impetteng met ni PCSO General Manager Mel Robles a saanna a Kitkitaen ti nagan dagiti winners.
Nupay kasta, impeksana nga nakalukat daytoy iti aniaman nga imbestigasyon gapu ta sigun kenkuana ket saan a mabalin nga i-manipulate ti resulta ti lotto.
