Impakaamo ni Armed Forces chief of staff Romeo Brawner Jr. a nagado a pagilian ti nangipakita ken nangipeksa ti suportada iti Pilipinas kasta met ti panangipaayda ti tulong iti baet ti pangta a mapaspasaran iti West Philippine Sea.
Dinakamat daytoy ni Brawner bayat ti panagtaripnongda iti kakaduada a dadaulo iti 2024 IISS Shangri-La Dialogue nu sadinno impaay ni President Ferdinand ”Bongbong” Marcos Jr. ti “keynote address” daytoy.
Aklonen ni Brawner a naklaat daytoy gaputa karaman ti European countries kadagiti interesado a mang-assistar ken mangtulong ti Pilipinas babaen iti “joint exercises” ken panagsanay pakairamanan ti “joint operations.”
Malaksid iti dayta, dinakamat pay ti nasao nga opisial a makikaduada a mangpapintas ti kabaelan ti Pilipinas.
Maipalagip a bayat ti “keynote address” ni President Marcos Jr. idi kalman, inawaganna ti China ken Estados Unidos a maisimpa ti panagsusupiat tapno mataginayon ti kappia ken kinatalged iti rehion.
Inyunay-unay ni Marcos nga agtaltalinaed dagiti prinsipio ken agtultuloy ti panangitandudo ti Pilipinas kas maibasar iti “international law” ken “rules-based order.”
