Maysa a lalaki idiay pagilian a Turkey ti nagbiag nga agmaymaysa iti maysa a nagbassit a kueba iti uneg ti dua a tawen kalpasan a naawanan ti pagtaengan gapu iti napigsa a ginggined idi tawen 2023.
Ad-adda a pinili ti lalaki nga agnaed iti kueba gaputa patienna a natalged ngem iti aniaman a pasdek nga inaramid ti tao.
Idi Pebrero 2023, dinayyeg ti 7.8-magnitude a ginggined ti makin-abagatan a Turkey.
Maysa kadagiti naawanan ti pagtaengan ket ni Ali Bozoğlan.
Nupay nakalasat ti pamiliana, mabuteng isuna iti posible a pannakaulit ti trahedia isut gapuna nga inkeddengna a saan nga agnaed iti aniaman a pasdek.
Pinilina kitdi ti agnaed iti naulimek a kueba iti ruar ti siudad ket pinagbalinna a pagtaengan daytoy.
Pinadas met ti Defne District Governorship nga ikkan isuna ti container home nga as-asideg iti siudad, ngem kaykayatna ti agtalinaed iti kueba, nga adayo iti kinatagari ti siudad.
