Kiddaw dagiti otoridad ti tulong ti komunidad kasta met ti kolaborasyon dagitoy iti Philippine National Police, Armed Forces of the Philippines, Commission on Elections tapno marisut dagiti napaspasamak a pammaltog sadiay Abra.
Iti agdama, dumanon metten iti dua pulo ket maysa ti bilang ti shooting incidents sadiay Abra.
Iti panakiuman ti Bombo Radyo kenni Police Lieutenant Colonel Daniel Pel-ey, Public Information Officer ti Abra Provincial Police Office, kinunana a kadagiti shooting incident ket maysa iti daytoy ti naberibikar nga adda kainaiganna iti eleksyon bayat a makumkumpirmar dagiti daduma.
Sigun kenni Police Lieutenant Colonel Pel-ey, siyam kadagiti insidente ket napilaanen iti kaso dagiti person of interest.
Inaklon met ni Pel-ey a tadta a tawen ti nakailistaanda kadagiti ado a shooting incidents.
Kabayatanna, nadoble metten ti deployment dagiti pulis sadiay Bangued, Pilar ken Bucay nangruna ket nakakategorya dagitoy iti orange category.
Kiddaw met ni Pel-ey kadagiti amin a politiko ken residente a saanda kuma nga idalan iti kinaranggas ti panagtaray dagitoy kasta met a lagipenda ti sinapataan dagitoy a panakasigurado ti linak ken kappia.
