BONTOC, MT PROVINCE – Kidkiddawen ita ti maseknan a pamilya ti tulong ti publiko tapno maipaayan iti hustisya ti ipupusay ni Jeffgart Dongpopen, criminology student manipud Bontoc, Mt. Province.
Maibasar iti diagnosis ti doktor a nang-asikaso iti 22-anyos a baro, nagsagrap daytoy iti brain herniation syndrome, severe traumatic injury ken maatap a pannakabugbogna a nangitunda iti ipupusayna.
Iti interview ti Bombo Radyo iti kabagyan ti biktima, maatap a nadangdangran daytoy iti maysa a resto bar idiay Samoki, Bontoc, Mt. Province idi Abril 5 a nangitunda iti pannakaospitalna ngem pimmusay metlaeng daytoy idi kalman.
Gapu iti daytoy, umap-apela ti maseknan a pamilya iti publiko nangruna dagiti nakakita iti umno a napasamak tapno agipaay dagitoy iti impormasyon kadagiti otoridad tapno mabigbig ti kinasiano dagiti suspek.
Iti phone interview ti Bombo Radyo iti Bontoc Municipal Police Station, kinuna daytoy a manarimaan ti imbestigasyonda isut gapuna a nagkedked dagitoy a mangipaay iti impormasyon.
Iti met interview ti Bombo Radyo iti uncle ti biktima, naiyawiden ti bangkay daytoy iti pagtaenganda idiay Bontoc, Mt Province.
Inladawan met dagiti makin-am-amo, kakabagyan ken gaggayem ti biktima a daytoy ti breadwinner iti pamilyada.
Innayonda pay a nagaget, nasingpet, naanus ken naisem ti biktima isut gapuna a saanda a ninamnama ti killaat ken nasapa nga ipupusay daytoy.//Bombo Noveh Organo
