Dumanonen iti 33 fire incidents ti nailista ti Bureau of Fire Protection idiay Bontoc, Mountain Province manipud Enero agingga iti agdama a bulan.
Iti interview ti Bombo Radyo, imbinglay ni Evona Faith Patingen-Chinalpan, Acting Chief Relations Officer-Bontoc BFP, karamanen ditoy dagiti structural fire, grass fire, ken forest fire.
Nangatngato daytoy nu idilig iti innem laeng a kaso ti uram no sadino tallo laeng kadagitoy ti forest fire.
Sigun kenkuana, dakkel ti epektona ti agbaliwbaliw a weather system ita.
Kabayatanna, manipud iti bilang a 33, kaaduan latta kadagitoy ti grass fires ken forest fires no sadino kadawyan a pagtataudan ti apoy ket kadagiti unattended burnings pakairamanan ti Kaingin system ken adda metlaeng dagiti sumagmamano a kaso a agtataud ti apoy manipud kadagiti maipatpatungpal a rituals kadagiti bambantay pakairamanan ti Manerwap, maysa a kaugalian nga ipatpatungpal dagiti panglakayen iti bantay tapno agayab iti tudo.
Iti sabali a bangir, unattended cooking met ti kangrunaan a rason dagiti structural fire.
Gapu iti daytoy, impetteng ni Patingen-Chinalpan ti kinapategna ti fire line nu kasapulan nga agpuor dagitoy tapno saan a nalaka nga agramaram ti apoy iti bantay. Malaksid iti dayta, napateg metlaeng a bantayanda a nalaing nu kasdiay na adda dagiti kasapulanda a puoran.
Innaklon met ni Patingen-Chinalpan a nu maipapan iti forest fire, marigatanda gapu ta saan a madanon dagiti kagawaanda dagiti pasdek. Nupay kasta, inlawlawagna a nu adda mapasamak nga uram, kitaenda nga umuna nu mabalinda nga ipatungpal ti swatting method ken panangaramid iti fire line.
Agtultuloy met ti panangpaingetda iti koordinasyonda ken munisipyo nangnagruna kadagiti babbarangay nangnangruna ta dagitoy ti adda iti mismo a pasdek.
Nagpallagip met daytoy iti publiko a kanayunda nga obserbaran ti kitchen fire safety kadagiti pagtaengan nangnangruna ita a bumarbara iti panawen. //kcs//
