Agyamyaman ni Mayor Constito S. Masweng iti Munisipyo ti Tadian, Mountain Province iti naipaay nga agarup P65 Milyon para iti nasao a munisipyo manipud ti Office of the Presidential Adviser on Peace, Reconciliation, and Unity (OPAPRU).
Impeksa ni Mayor Masweng a ti pakaaramatan ti pondo a naipaay para kadakuada ket pannakaimprove ti dua a kalsada iti masakupanda.
Agarup P50 milyon manipud iti nadakamat a gatad ti maipaay iti pannakapasayaat ti kalsada idiay Tadian-Nacawang Provincial Road bayat a ti nabatbati a pondo ket para iti farm-to-market road.
Kinunana ti opisyal a dakkel a tulong ti pondo a naipaay gapu ta dagiti kalsada a nabigbig a pakaaramatan ti kalsada ket agserbi kas alternative road para kadagiti local tourism ken dadduma pay.
Sigun iti Mayor, apaman a maprocure ken madownload da ti nasao a pondo a naipaay kadakuada, mairugi a dagos ti road construction.
Maipalagip a inlatang ti OPAPRU ti agarup P900 bilyon iti Mountain Province kas paset iti PAyapa at MAsaganang PamayaNAn (PAMANA) program ti nasao nga ahensya, maysa a flagship peace and convergence framework ti OPAPRU.
Sigun kenni Atty. Wilben Mayor, Undersecretary for Local Conflict Transformation and Peace Sustainability ti nasao nga ahensya, dagiti nasao a pondo a nailatang ket para kadagiti infrastructure projects ti nasao a probinsya.
Innayon pay daytoy a babaen kadagiti imprastraktura, mapalag-an ti rigat ti pannakaideliver dagiti nagduduma a produkto dagiti mannalon wenno anyaman a produkto dagitoy.
Inlawlawag ti opisyal nga adu ti naipaayan ti pondo iti Mountain Province gapu ta adu dagiti nakitada a kasapulan a mapondoan bayta iti inspeksyon dagitoy iti nasao a lugar.
Kabayatanna, ti P657 Milyon municipal PAMANA fund ket mangpondo kadagiti farm-to-market road construction ken local access infrastrucure a naiwaras kadagiti nagduduma a munisipyo: P65 Milyon ti naipaay idiay Tadian, P165 Milyon diay Sabangan; P100 Milyon idiay Besao, P95 Milyon idiay Paracelis, P85 Milyon idiay Bauko, P60 Milyon idiay Sagada, P50 Milyon idiay Bontoc, P30 Milyon idiay Barlig, ken P7 Milyon idiay Sadanga.
Imbinglay met ni Provincial Engineer Edward B. Likiga a ti nailatang a P257 milyon iti Provincial Government ti mangpondo iti innem a proyekto kas iti third phase ti Balicanao-Am-am Provincial Road idiay Bauko nga addaan pondo a P50 Milyon ken second phase ti Mountain Province Peace and Development Center idiay Mt. Data, Bauko, no sadino dumanon iti P25 Milyon Pesos ti kasapulan a pondo.
Karaman metlaeng iti mapondoan ket ti konstruksyon ti Am-am Bridge idiay Bauko no sadino kasapulan ti P25 milyon a pondo.
Malaksid iti dayta, karaman metlaeng kadagiti proyekto ti pannakapasayaat ti Sabalan, Bacarri to Catao, Buringal FMR idiay Paracelis no sadino agkasapulan daytoy iti P75 Milyon pondo, pannakapasayaat ti Mt. Data Hotel Ground idiay Mt. Data Bauko nga agkasapulan iti P7 Milyon , ken pannakapasayaat metlaeng ti Otucan Core Shelter Roads, Kalimbatawa, Otucan Sur, Bauko no sadino kasapulan met ditoy ti agarup P25 Milyon a pondo. // via Bombo Noveh Organo
