Masapul nga agtitinnulong dagiti kameng ti media ken vloggers tapno malabanan ti panagadu ti saan a pudno nga impormasion ken disinformation bayat ti eleksion, sigun kadagiti beterano a journalists.
Kinuna ni Joyce Pañares, training director iti Philippine Press Institute (PPI) a kasapulan a tumabuno dagitoy kadagiti training ken seminar a kaduada dagiti journalist tapno maibinglayda dagiti kasayaatan nga ar-aramidenda iti nasao a tay-ak.
Impaganetget ni Pañares a napateg dagiti vlogger ken journalist iti panangiwaras ti impormasion bayat ti eleksion.
Immanamong met iti nasao a banag ni Philippine Center of Investigative Journalism’s training director a ni Rowena Paraan.
Kabayatanna, bayat ti diskusion kadagiti regional media councils, kinuna dagiti pannakabagi manipud iti tunggal grupo nga agtultuloy a sumangsangoda iti harassment, nababa a sueldo, ken diskriminasion iti coverage.
Sumangsango pay ti dadduma a kameng ti media iti reklamo a libel gapu iti coverage-da.
Kinuna ni Paraan a nasken nga agtitinnulong dagiti newsroom ken bigbigenda dagitoy a parikut.
