Impaganetget ti Baguio City Police Office nga agtuloy ti panakaimplementar ti number coding scheme ita a semana santa.
Iti panakiuman ti Bombo Radyo kenni Police Colonel Ruel Tagel, City Director ti Baguio City Police Office, kinunana nga awan ti exemption iti number coding scheme gapu ta no anya ti maiap-aplikar kadagiti residente ket isu met ti maiyaplikar kadagiti turista.
Gapu iti dayta, nasken a maamoan dagiti turista no anya ti number coding scheme iti siudad.
Maipalagip nga iti number coding scheme, dagiti amin a kita ti lugan nga adda iti “last number” ti plakada a 1-2 ket maiparit nga agbyahe iti aldaw ti Lunes; ti 3-4 ket maiparit nga agbyahe inton Martes; ti 5-6 ket maiparit nga agbyahe inton Miyerkules; ti 7-8 ket maiparit nga agbyahe inton Huwebes ken ti 9-0 ket maiparit nga agbyahe iti aldaw ti Biyernes.
Inlawlawag ni Tagel a ti number coding scheme ket saan a nalift wenno maituloy a maiyemplementar ita a Holy Week nangruna ket mapatta-patta a dumanon iti agarup 150-K angingga 200-K a turista ti sumangbay iti City of Pines.
Kabayatanna, kinuna ti City Director nga awan ti mapangpanggep a rerouting scheme nupay kasta, maimplementar ti bakasyon lane ken dagiti control points tapno dagiti lugan a saan a kasapulan a dumalan iti Central Business District ket aramatenda ti bakasyon lane.
