BAGUIO CITY – Malaksid kadagiti tokens, Strawberry, nateng ken dadduma pay a regalo.
Balon dagiti pito a napagasatan a Lucky Summer Visitors ti isem ken ragsak iti panag-awid dagitoy sadiay Pasig City ita nga aldaw, April 20, 2025.
Karaman kadagitoy dagiti agkakapamilia a da Carolyn Andres Celestino, agtawen iti 57; Ni Ricardo Celestino Jr., agtawen iti 62; Eunice Celestino, agtawen iti 13; Julia A. Celestino, 11-anyos; Eugin Celestino, agtawen iti 3; Jerome Celestino, agtawen iti 30, manipud iti Ramos Village, Manggahan, ken Sta. Lucia, Pasig City; ken Jellyn Bautista, agtawen ti 31, taga Balungao, Pangasinan.
Inkari met dagitoy nga agsublida ken itandududa dagiti turismo iti siudad ti Baguio ken probinsia iti Benguet.
Kabayatanna, impekksada ti panagyamanda iti BCBC ken dagiti amin a partners ti nasao nga organisasyon gapu iti red carpet treatment a naipaay kadakuada.
Aglaplapusanan met ti panagyamanda iti siudad ken dagiti munisipio a nagturunganda iti probinsia iti Benguet.
Maipalagip a ti “Search for Lucky Summer Visitors” ket tinawen a programa ti Baguio Correspondents and Broadcasters Club (BCBC) babaen iti pannakitinnulong dagiti nadumaduma nga ahensia iti siudad ken probinsia iti Benguet.
Panggep daytoy a maipaayan dagiti “first time visitors” iti naisangsangayan a padas iti Baguio ken Benguet babaen iti uppat nga aldaw a red-carpet treatment, manipud Maundy Thursday agingga iti Easter Sunday, kas paset ti summer tourism promotion ti Baguio ken Benguet.//mp4
