Agtultuloy ti panangipukkaw iti hustisya ti ama ti pimmusay nga ubing iti napasamak nga aksidente idiay Ninoy Aquino International Airport Terminal 1 idi May 4.
Kinuna ti ama ti agtawen iti uppat nga ubing nga “unforgivable” ti driver iti Sports Utility Vehicle a nakadungpar iti anakna nu sadino, kidkiddawenna a maibalud daytoy.
Para iti nasao nga ama, ti panangpakawanna iti driver a responsable iti ipupusay ti anakna ket imposible.
Maipalagip a napasamak ti aksidente iti Departure Area iti NAIA Terminal 1 idi Domingo nu sadino, pimmusay ti dua nga indibidwal pakairamanan ti nasao nga ubing ken ti maysa pay nga agtawen met iti 29.
Immuna metten a rimwar iti otopsiya dagitoy a blunt force trauma ti gapuanan iti ipupusayda.
Iti agdama, naimansayag idiay Hagonoy, Bulacan ti bagi ti agtawen iti 29 a biktima bayat nga adda met sadiay Lipa City, Batangas ti bagi ti menor de edad.
Kabayatanna, negatibo met ti resulta iti alcohol ken drug test ti SUV driver sigun iti Philippine National Police Aviation Security Group (PNP AVSEGROUP).
