Napaay ni sigud a National Youth Commission chairperson Ronald Cardema ken ti asawana a ni Marie Cardema a mangipila ti impeachment complaint kontra kenni President Ferdinand Marcos, Jr. idi kalman seknan iti pannakatiliw ken pannakaibalud ni sigud a President Rodrigo Duterte idiay Netherlands idi Marso a onse.
Sigun iti agassawa a Cardema, saan nga inawat ti opisina ni House Secretary General Reginald Velasco ti impeachment complaint uray nu sigud a naberipikar gaputa inyendorso daytoy ni Duterte Youth party-list lawmaker Ducielle Cardema, kabsat ni Ronald, a chairman ti nasao a grupo.
Impaganetget dagiti agassawa a “ministerial duty” ti opisina ni Velasco nga awaten ti impeachment complaint.
Maipalagip nga impablaak idi ni Ronald a mangipula isuna ti impeachment complaint kontra iti presidente gaputa naisuko ni Duterte iti ganggannaet.
Ni sigud a President Duterte ket kinemmeg dagiti otoridad idi Marso 11 kalpasan a nakadanon manipod iti “flight” daytoy a nagtaud idiay Hongkong a nakabasar iti arrest warrant nga impaulog ti International Criminal Court idiay The Hague.
Kabayatanna, para kenni Assistant Majority Leader Jude Acidre, awanen ti umno nga oras tapno mapagsaritaan ti impeachment complaint nga impila da Ronald Cardema ken Marie Cardema kontra iti presidente.
Agduadua metlaeng ni Acidre iti rason ken ti oras iti panangipila, uppat nga aldaw sakbay ti eleksion.
