Pinagyamananna ni Alexander Pinrad, Election Officer-COMELEC-Kabayan, Benguet dagiti amin timmulong kadakuada, kas kadagiti electoral boards, police personnels, barangay officials ken dadduma pay para iti balligi nga eleksyon iti nasao a munisipyo.
Iti pannakiuman ti Bombo Radyo kenkuana, dakkel ti tulong dagitoy rason nga awan ti nagbalin nga aberya bayat ti panagpabutos dagitoy.
Gapu iti dayta, balligi ken naannayas ti kaleppas nga eleksyon iti intero a munisipyo ti Kabayan, Benguet.
Kabayatanna, al-allukuyenna dagiti nangabak ken naabak a kandidato a mangipila dagitoy iti Statement of Contributions and Expenditures (SOCE) dagitoy.
Sigun kenkuana napateg ti panangipila iti Statement of Contributions and Expenditures (SOCE) sakbay nga agtugaw iti takem dagiti nabutusan a kandidato.
Napateg metlaeng a mangipila dagiti naabak a kandidato iti kastoy tapno saanda a madiskwalipikar no mangipilada manen iti Certificate of candidacy-da inton sumaruno nga eleksyon.
