Naituding a mangipatungpal ti local government unit ti La Trinidad, Benguet iti clean-up drive inton Hunyo nangruna iti paset ti strawberry farm tapno masigurado a saan a maulit ti panakalayos manen ti nasao a lugar nangruna no panagtutudo.
Iti panakiuman ti Bombo Radyo kenni Mayor Romeo Salda ti La Trinidad, Benguet, mangnamnama daytoy saan a maulit ti napasamak a panakalayos ti entiro nga strawberry farm kagiddan iti napigsa a panagbayakabak iti tudo nangruna ket manarimaan ti panakaipatungpal ti flood control iti nasao a lugar.
Inlawlawag ni Salda a no nasurot kuma ti design a naiparang kabayatan ti konsultasyon seknan iti bolo creek ket awan kuma unay ti problema.
Iti agdama, agsasagana ti munisipyo ti La Trinidad para iti panawen ti panagtutudo no sadino nakasaganan dagiti evacuation centers dagitoy kasta met manarimaan ti isaysayangkatda ti dengue awareness.
