Saan paylaeng a makadesision dagiti kameng ti Liberal Party (LP) a nakaala ti tugaw iti House of Representatives nu rumbeng a makikaduada iti Minority bloc wenno agaramidda iti bukodda a pangngeddeng, sigun kenni sigud a senador ken party-list representative-elect a ni Leila de Lima.
Inlawlawagna a manarimaan paylaeng ti “exploration” dagitoy iti nagduduma a pagpilianda.
Impakaamo daytoy ti sigud a senador kalpasan a guyguyuguyen ida ni incumbent Minority Leader ken 4Ps party-list Rep. Marcelino Libanan a makikadua iti Minority bloc.
Idi met nadamag nu kayatda a makikadua iti kaalyado ni sigud a President Rodrigo Duterte, nga agdama nga oposision ni incumbent President Ferdinand Marcos Jr. ken ti kasinsinna a ni House Speaker Ferdinand Martin Romualdez—iti Minority bloc, insungbat ni De Lima a saanna a kayat.
Maipalagip nga idi Mayo baente singko, impablaak ni Deputy Speaker David Suarez nga uppat manipod iti innem a kameng ti Liberal Party iti 20th Congress ket paset itan iti supermajority coalition iti Kamara a mangsuporta iti liderato ni Romualdez.
Malaksid iti Liberal Party, kinuna ni Suarez a buklen ti supermajority bloc ti Lakas-Christian Muslim Democrats, ti Nacionalista Party, National Unity Party, Nationalist People’s Coalition, Partido Federal ng Pilipinas, ken ti Party-list Coalition Foundation Inc.
