LA TRINIDAD, BENGUET – Maisayangkat dagiti nagduduma nga aktibidad iti munisipyo ti La Trinidad kas selebrasyon ti Philippine Environment Month.
Iti panakiuman ti Bombo Radyo kenni Arthur Pedro, Administrative Officer V ti La Trinidad Municipal Environment and Natural Resources Office, karaman kadagiti naka-schedule nga aktibidad ket ti roadside clean-up drive, tree planting activity inton Hunyo 12, ti 2nd quarter Balili River Clean-up Drive inton Hunyo 20, Arbor Day Tree Planting inton Hunyo 27, ken Collection event for empty pesticide containers inton Hunyo 30, 2025.
Dagiti nasao nga aktibidad ket tinawen nga ipatpatungpal ti nasao nga ahensya tapno maprotektaran dagiti natural resources iti nasao a munisipyo.
Mangnamnama met ni Pedro nga agserbi kuma dagiti nasao nga aktibidad kas palagip kadagiti umili sadiay La Trinidad a ti panangaywan kadagiti natural resources ket saan laeng nga akem ti local government units no di ket responsibilidad ti tunggal maysa.
Gapu iti dayta, kidkiddawenna ti agtultuloy a kooperasyon ti umili seknan iti umno a panangidisposeda kadagiti basura dagitoy.
