BAGUIO CITY – Nakemmeg ti maysa a car washer kalpasan ti naipatungpal a buy-bust operation iti siyudad ti Baguio iti pasado alas syete ti rabii.
Ti nasao a suspek ket maysa a lalaki, awanan iti asawa, 35-anyos, residente sadiay Guisad, Baguio City ken tubo sadiay Penafrancia, Naga City, Bicol Region.
Nakumpiskar manipud kenkuana ti dua a pidaso ti heat-sealed transparent plastic sachet a naglaon iti maatap a shabu nga agdagsen iti 3 grams ken agbalor iti PhP 20,400, maysa a pidaso ti box ti sigarilyo a naikargaan ti nasao a maatap nga iligal a droga, ken dadduma pay a paraphernalia kas iti genuine ken boodle money, lighter, selpon, ken dadduma pay.
Sumango ti suspek iti kaso a panaglabsing iti Republic Act 9165 wenno Comprehensive Dangerous Drugs Act of 2002.
Balligi ti nasao nga operasyon babaen iti nagtitipon a pwersa ti Philippine National Police, Drug Enforcement Group Special Operations Unit Cordillera (lead unit), Philippine Drug Enforcement Agency Cordillera Baguio-Benguet Provincial Office, Baguio City Police Office Police Station 2 (BCPO PS2), Baguio City Drug Enforcement Unit, ken PRO CAR Regional Drug Enforcement Unit (PRO CAR RDEU).
