BAGUIO CITY- Naiserra ti Tennis Court ken Parking Area iti siudad ti Baguio, kasaruno iti naobserbaran dagiti maseknan nga ahensia a sumagmamano a parikot.
Iti pannakiuman iti Bombo Radyo kenni Engr. Bonifacio Dela Piña, City Administrator iti siudad ti Baguio, kinunana nga awan ti executive order ken ordinansa seknan iti operasion ti City Parking manipud iti opisina ni Mayor Benjamin Magalong ken ti City Council.
Malaksid iti dayta, naobserbaranda a sumaysayad dagiti lugan iti exit ti athletic bowl.
Inlawlawag ni Dela Piña a kasapulan a maurnos ti ordinansa ken executive order ti pannakaimanehar daytoy agsipudta, agsingir dagitoy iti P50 tunggal oras ken tapno maliklikan a magundawayan ti nasao a parking area.
Inyunay-unay ti nasao nga opisial a kasapulan nga urnosenda ti operasion tapno saan a maabuso nangruna dagiti maipapaayan iti discount.
Inlawlawag ni Dela Piña a nangatngato ti parking fee no idilig iti kadakkelan a mall iti siudad tapno maipaayan dagiti dadduma iti gundaway.
Manamanama a mailukat manen daytoy intun sumaruno a lawas iti kanito nga awan iti maobserbaran a parikot.
Sipapannakel met ti nasao nga opisial a napintas ti kapadasan dagitoy iti umuna a panakailukat ti nasao a parking ken Tennis area.
Kabayatanna, manamnama a mapasayaat ti canteen iti athletic bowl a mangsaklaw kadagiti indibidual nga agturong iti athletic bowl ken iti Burnham Park.//mp4
