Dumanon iti dua agingga uppat a panagsabog ti maisaysayangkat ken mangmangngegan dagiti dua nga overseas Filipino workers (OFW) idiay Israel iti tunggal rabii.
Iti pannakiuman ti Bombo Radyo ken da Rossel Frontera ken Jomer Eugenio, Bombo International News Correspondent idiay Israel, kinunada a saandan a makaturturog iti tunggal rabii gapu kadagiti napigsa nga uni dagiti missile attack.
Sigun kenni Frontera, numan pay addayo ti pangpanggedanna manipod iti kapital ti Israel, mangngeganna latta ti napigsa a panagatake, bayat a ni Eugenio a mangmangged idiay Tel Aviv, maimatanganna mismo ti mapaspasamak a panagatake iti tangatang iti nagbaetan ti Israel ken Iran.
Aklonenda a makariknada ti panagbuteng ken “nervous” iti kanito a mapasmapasak ti panagbinnales ti dua a pagilian.
Nu idilig iti napasamak a giyera idi napalabas a tawen, ad-adda a nakaro ti agdama a giyera gaputa agar-aramat dagitoy ti drones ken ballistic missiles, a napigpigsa ngem dagiti rockets wenno aerial attacks a maipatpatayab idi napalabas a tawen, sigun kenni Frontera.
Kinunana a saan a kas idi napalabas a tawen a nalaka a ma-detect ken ma-intercept ti Israel dagiti umay a rockets ken dadduma pay a short-range threats iti tangatang.
Kabayatanna, saanda paylaeng a makaawid iti Pilipinas manipod idiay Israel gaputa nakaserra ti amin nga airport terminal wenno international flights.
