Manarimaan ti panagaramid ni Oscard Dodon iti slope protection iti masakupan ti lote daytoy tapno malapdan ti panagtennag dagiti basura nga agtataud iti lote daytoy paturong iti karayan idiay Brgy. Tuding, Itogon.
Iti pannakiuman ti Bombo Radyo kenkuana, kinunana a nangrugi ti panangaramidna iti slope protection idi January 2025 ngem saan pay daytoy a nalpas.
Imbinglay daytoy a saanna a napupuotan dagiti indibidual nga agibel-belleng iti basura iti lotena agsipudta mamati daytoy a tunggal rabii ti panangibelleng dagiti indibidual kadagiti basura sadiay.
Inlawlawagna met nga awan ti pinalubusanna a mangitinnag iti basura sadiay.
Kinunana pay a nangitennnag metlaeng ti Department of Public Works and Highways kadagiti basura sadiay.
Nupay kasta, inlawlawag met ti maysa a personnel ti Department of Public Works and Highways-Benguet 1st District a namingsanda laeng a nangibelleng iti basura sadiay idi 2023 idi napasamak ti landslide iti Shilan-Beckel road.
Impetteng ti nasao a personnel a tapno malukatanda ti nasao a kalsada ken awan ti dadduma a posible a pangitinnaganda kadagiti basura ket nagdesisyon dagitoy nga idiayda lattan nga ibelleng dagiti basura.
Maipalagip nga immunan nga immapela dagiti residente sadiay Brgy. Tuding, Itogon gapu kadagiti basura nga maiyan-anod iti karayan sadiay.
Nupay immasideg dagitoyen kadagiti nagduduma nga ahensya ti gobyerno, awan paylaeng ti makita dagitoy nga aksyon iti baet nga uppat a tawen dagitoyen nga ilablaban ti pannakapreserba ti karayan iti nasao a barangay.
