Rumbeng nga ipatungpal ti gobierno ti pannakaiparit dagiti online gambling advertisements iti tengnga ti kumarkaro a pakaseknan maipapan iti epekto dagiti digital gambling platforms kadagiti pamilia, agtutubo, ken vulnerable sectors, sigun iti maysa a grupo.
Para kenni Atty Nicasio Conti, CEO ti Capstone-Intel Corporation, maysa a research group, kinunana a ti online gambling ket maysa a “silent epidemic.”
Sigun pay kenni Conti, ti online gambling ket 24/7 a mabalin nga ay-ayamen, ken kaaduan a puntiriana ket dagiti nakurapay, ken agpampammarang daytoy kas “entertainment” wenno paglinglingayan.
Kinunana pay a ti panagsugal ket makaadik ken natalna a mangdadael iti biag ti maysa a tao.
Gapu iti daytoy, idagdagadagna iti PAGCOR, Bangko Sentral ng Pilipinas (BSP), ken ti Department of Information and Communications Technology, kasta metten ti Kongreso tapno agkaykaysa a mangaramid kadagiti wagas a mangsalaknib kadagiti indibidual a kas kadagiti dadduma a narang-ay a pagilian a ti online gamblin ket “regulated.”
Immunan a kinuna ni Palace Press Officer Undersecretary Atty. Claire Castro a napaserra ti gobierno ti 7,000 a saan nga otorisado nga online gaming websites.
