Dinayyeg ti magnitude 6.1 a ginggined ti Sarangani, Davao Occidental iti pasado alas siete itay agsapa (June 28, 2025).
Sigun iti Philippine Institute of Volcanology and Seismology (PHIVOLCS), masarakan ti epicenter ti ginggined iti 05.06°N, 126.12°E – 085 km S 58° E ti Sarangani Island iti Munisipyo ti Sarangani.
Addaan daytoy iti kauneg a 79 km.
Narikna ti Intesity V idiay Glan, Malungon, Sarangani; Pantukan; Davao de Oro.
Kabayatanna, narikna ti Intensity IV idiay Alabel, Kiamba, ken Malapatan sadiay Sarangani; General Santos City; Tupi, Koronadal City idiay South Cotabato; Davao City ken Santa Cruz idiay Davao del Sur; Jose Abad Santos idiay Davao Occidental; ken Monkayo, idiay Davao de Oro.
Nailista met ti Intensity III idiay Maasim ken Maitum, Sarangani; Banga, Tampakan, Surallah, ken Polomolok idiay South Cotabato; Maco, Nabunturan idiay Davao de Oro; kasta met ti Matanao ken Magsaysay idiay Davao del Sur.
Sigun iti PHIVOLCS, awan ti nadadael ngem posible a mapasaranda ti aftershocks.
Malaksid iti dayta, awan metlaeng ti nailista a pangta ti tsunami kalpasan ti ginggined.
