Impablaak ni Department of Health Secretary Teodoro Herbosa nga adalen paylaeng ti gobierno nu iyam-ammo ti Qdenga vaccine iti Pilipinas tapno malapdan ti dengue nangruna kadagiti ubbing.
Iti agdama, manarimaan ti panagadal ti Food and Drug Administration iti application ti Japan-based Takeda Pharmaceuticals para iti certificate of product registration (CPR) ti Qdenga a naaramid sipud pay idi 2023.
Inlawlawag ni Herbosa bayat ti maikadua a Dengue Summit nga inorganisar ti Philippine Medical Association a saan a maaramat ti Qdenga kas “mass-based immunization.”
Kinunana a masapul a maaramid daytoy iti klinika gaputa kasapulan a maamuan ti serologic status ti maysa nga indibidual nu maipaayan daytoy iti dengue vaccine.
Idi 2023, kinuna ni Herbosa nga awan ti panggepna a mangi-introduce manen iti Dengvaxia gapu kadagiti kontrobersia iti bakuna.
Maipalagip a ti dengvaxia ket kontrobersial gapu iti pakainaiganna iti ipupusay dagiti ubbing a Pilipino a nagpabakuna.
Kabayatanna, kinuna ni Research Institute for Tropical Medicine—Research and Innovative Office head Dr. Charissa Borja-Tabora nga irekrekomendar ti World Health Organization iti panagaramat ti Qdenga kadagiti ubbing nga agtawen ti innem agingga iti sangapulo ket innem iti lugar nga addaan iti nangato a pannakayakar ti dengue.
