Mangipila ni Businessman Charlie “ Atong” Ang iti formal a reklamo kontra iti whistleblowers a da Alyas Totoy wenno Julie” Dondon” Patidongan ken Alan Bantiles alias “Brown” intun June 03, 2025.
Kasaruno daytoy ti imbutaktakda a ni Ang ti mastermid iti kaso dagiti mapukpukaw a “Sabungeros.”
Maibasar iti ipila a reklamo ni Ang, nagkadwa da Patidongan ken Bantiles tapno mangaramid iti panagtakaw babaen ti kinaranggas, pammutbuteng, grave threat, grave coercion, panangidarum kadagiti inosente a tattao ken panangpabasol kontra kenni Ang.
Sigun iti kampo ni Ang, ti inaramid da Patidongan ken Bantiles ket nangitunda iti pannakadadael ti repotasyon, nangitunda iti anxiety ken stress iti pamilya ni Ang.
Inyunay-unay pay ti nasao a kampo nga ulbod, awan nakaibatayan ken dakes ti paggep iti akosasyon kontra kenni Ang.
Kabayatanna, umap-apela ti kampo ni Ang iti publiko ken media a liklikanda ti panangiwaras iti palso a damag wenno kongklusion nga awanan iti ebidensya.
Mainaig iti dayta, immunan a kinuna ti Philippine National Police-Internal Affairs Service (PNP-IAS) a saanda a mangipatungpal iti substantial administrative investigation kadagiti mapukpukaw a sabungeros agingga nga awan ti swom affidavit manipud iti key witness a nangibaga nga agarup 20 a police office ti karaman iti pannakapukaw dagiti sabungeros.
Maipalagip nga inadmitir ti suspek a nabigbig a ni alias Totoy, maysa kadagiti innem a security guard iti Manila Arena a pimmusayen dagiti sabungero ken naibellengda iti Taal Lake.
