Impakaamo ti Armed Forces of the Philippines nga imbestigaranda ti mapapati a hazing iti uneg ti PMA iti Baguio City ken kinunada a saanda nga ipalubos a saan a madusa dagiti nangaramid nu mapaneknekan a pudno daytoy.
Sigun kenni Col. Francel Margareth Padilla, pannakangiwat ti Armed Forces of the Philippines, saanda nga i-tolerate ti aniaman a kita ti panangabuso, hazing wenno maltreatment iti uneg ti nasao nga akademya.
Kinunana a suportaranda ti pannakaipatungpal ti Anti-Hazing Act of 2018 ken agtalinaedda iti commitment dagitoy a mangitandudo ti karbengan, pagimbagan ken dignidad ti tunggal kadete ken personnel nga adda iti sidong ti panangaywan dagitoy.
Nupay saan pay a napasamak ti pormal nga imbestigasion, nangisayangkaten ti aksyon ti PMA kadagiti kadete a mapapati a nairaman.
Kinumpirmaren ni PMA spokesman Lt. Jesse Nestor Saludo a naipaay dagiti maitutop a pannusa kadagiti tallo a kadete a mapapati a nairaman iti hazing.
Mapapati nga imbilin ti squad leader ni Maragguns ti 210 touring hours, panagtalinaedna iti 210 nga aldaw iti kuartona, ken 60 demerits, ngem mabalin latta nga aramiden ni Maragguns ti tumabuno iti klase, mangan iti mess hall ken aramiden dagiti pagrebbenganna kas kadete a kas ti panagparada ken dadduma pay nga aramid.
