Idagdagadag ni Senator Kiko Pangilinan ti nainget a panagbantay ken panangipataw iti kaskenan a pannusa kadagiti hoarders ken dagiti manag-gundaway.
Malaksid iti dayta, impeksa ti senador a rumbeng metlaeng a mabantayan dagiti presyo ken kartel dagiti taraon kagidan iti posible nga epekto ti El Niño no sadino posible a bumaba ti produksyon ti agrikultura ken ngumato ti presyo dagiti kangrunaan a gagatangen.
Kas mangidadaulo iti Senate Committee on Agriculture, kinidaw ni Sen. Pangilinan iti Department of Trade and Industry (DTI), Department of Agriculture (DA), Price Coordinating Council (PCC), ken dadduma pay a maseknan nga ahensya nga ingetanda ti panagbantay kadagiti merkado ken siguradoenda a maipatungpal ti price freeze kadagiti lugar a mangideklara iti State of Calamity.
Kinuna ti senador a babaen iti nasao a wagas, masalwadan ti umili nangnangruna iti panangsango ti pagilian iti epekto ti El Niño.
