Panggep ti Department of Education (DepEd) nga ikonekta iti internet dagiti amin a parapubliko a pagadalan iti pagilian inton ngudo ti 2025.
Daytoy ti kinuna ti nasao nga ahensia, kalpasan ti pannakairuar ti National Fiber Backbone (NFB) Phase 2 ken 3 idi Hulio 7 sadiay Leyte.
Maysa daytoy a programa a mangidanon kadagiti baro a connection points iti nagduduma a paset ti pagilian, tapno mapasayaat ti bandwidth ken access dagiti probinsia, opisina ti gobierno, ken dagiti public schools kadagiti geographically isolated ken disadvantaged areas.
Sigun kenni Education Secretary Sonny Angara, saan a mapasayaat ti kalidad iti edukasion ti pagilian nga awanan iti internet isu’t gapuna nga isaksakadda ti nasao a programa.
Iti direktiba ni President Ferdinand Marcos Jr., ken babaen ti tulong ti Department of Information and Communications Technology ken ti sibubukel a gobierno, itandudoda ti digital inclusion babaen iti Digital Bayanihan Project.
