Bimmaba iti 26.36% ti vehicular incidents bayat ti maikadua a kuarter kalpasan ti nainget a pannakaipatungpal dagiti pagannurotan ti speed limit iti intero a siudad ti Baguio.
Sigun kenni BCPO Director Col. Ruel Tagel, nababbaba ti nairekordda a porsiento nu idilig iti umuna a kwarter ti agdama a tawen nu sadinno, manipod iti 258 a kaso ket bimmaba iti 190.
Patienna a daytoy ket gapu iti nainget a pannakaipatungpal dagiti linteg ti trapiko ken ordinansa ti siudad.
Idi laeng Hunio, kinuna dagiti otoridad a dumanon iti 796 a motorista ti naglabsing iti “King of the Road” Ordinance, ken naipaulog ti 237 a tiket gapu iti overspeeding.
Ti “King of the Road Ordinance” ket kalikagumanna dagiti drayber nga aginayad nu umasideg kadagiti pedestrian lanes, bayat a ti Speed Limit Ordinance ket kasapulan a maximum ti 20 kph ti panagandar ti lugan iti uneg ti Central Business District (CBD), ken 30 kph kas sapasap nga speed limit iti siudad.
Nupay naipasa ti speed limit ordinance idi 2019, naing-inget ti pannakaipatungpalna itay laeng nabiit kalpasan ti direktiba ni Mayor Benjamin Magalong.
Naibilin ti nainget a pannakaipatungpal ti nasao nga ordinansa gaputa kaaduan nga aksidente ket mechanical failure gapu iti overspeeding, a mangituntunda kadagiti drayber a maawanan ti kontrol.
Malaksid iti pannakaipatungpal ti ordinansa, kinuna ni Tagel nga agtultuloy ti panangipatungpal ti BCPO iti “OPLAN D.R.I.V.E.”, maysa a traffic safety program a maitunos kadagiti tallo nga E’s: Enforcement, Education, ken Engineering.
