Sumangsango ti kaso a panaglabsing ti Article 310 ti Revised Penal Code wenno ti qualified theft ti maysa a babai, agtawen ti 21, ken residente ti Carrantes Street, Middle Quezon Hill Subdivision, Baguio City.
Maibasar ti report ti pulisya, ti suspek ket tinangdanan ti complainant a lalaki nga agtawen ti 34, agtagikua ti maysa a cafe sadiay Rimando Road, Aurora Hill Proper.
Natangdanan daytoy kas maysa a secretary para iti nasao a negosyo.
Kas maysa a secretary, naibilin kenkuana ti pannakaiproseso ti kaskenan a dokumento ken panangi-remit kadagiti voluntary contributions dagiti empleyado iti Social Security System (SSS).
Gapu iti daytoy, intalek ti complainant ti gatad a dumanon iti P13,680 a kontribusion dagiti lima nga empleyado para iti bulan ti Pebrero ken Abril.
Nupay kasta, saan nga inremit ti suspek ti kuarta iti nasao nga ahensia.
Natakuatan ti complainant a na-appropriate ti suspek ti kuarta iti bulan ti Hunyo.
Nagsaludsod ti complainant manipod iti suspek ti resibo ngem awan ti impaayna ken saan a simmungbat daytoy.
Nagturong ti complainant iti opisina ti Social Security System tapno beripikaren ket nakumpirmar nga awan ti nairemit.
Ita laeng a bulan, nangipaulog ti promisory note ti complainant tapno urnosen ti suspek ti obligasionna ngem saanna a na-settle daytoy.
Gapu iti dayta, nangipilan ti kaso ti complainant ken nairefer ti kaso iti prosecutor’s office. //Bombo Noveh Organo
