Maisingsingasing ita iti Baguio City Council ti maysa nga ordinansa a healthcare and insurance program para kadagiti amin nga opisial ti gobierno ken empleado ti siudad ti Baguio, a mangipasigurado iti pannakagun-odda iti de kalidad a serbisio medikal ken pinansial a proteksion no panawen ti sakit wenno medical emergency.
Sigun kenni Baguio City Councilor Leandro Yangot Jr., nagsurat iti ordinansa, kinunana nga iti baet nga adda ti Universal Health Care Act or Republic Act No. 11223 iti pagilian, ti addang ket mangipasigurado kadagiti opisial ken empleyado a direkta a makagun-odda ti nasao a programa iti siudad.
Ti programa ket pakairamanan ti maintenance ken life insurance, nangruna ti tinnawen a physical examination, outpatient services, pre-natal ken post-natal care, emergency care services, hospitalization wenno inpatient services, dental coverage, ken dadduma pay.
Agepektibo daytoy apaman a maipaulog ti insurance policy.
Ti programa ket tinnawen a mapondoan babaen ti budget ti Human Resource Management Office (HRMO) wenno aniaman a magun-od a pondo ti siudad.
Tapno maipasigurado ti pannaka-implementar, makikoordinar ti Human Resource Management Office iti Local Finance Committee ken ti empleyado ti lokal a gobierno ti siuadad a mangaramid ti Implementing Rules and Regulations (IRR) iti uneg ti siam a pulo nga aldaw manipod iti pannaka-aprobar ti ordinansa.
Ti singasing ket naaprobaranen iti umuna a pannakaibasana itay laeng nabiit ken naiturongen iti Committee on Appropriations and Finance Cluster A para iti review.
