Pimmusay ti maysa a lalaki, addaan ti umno nga edad, tubo ken residente ti Benguet kalpasan a mapapati a nagkettel ti bukodna a biag.
Maibasar iti imbestigasion ti La Trinidad Municipal Police Station, nadiskobre daytoy ti kasinsinna a nakabitin iti likudan ti pagnanaedanda.
Iti pammalawag ti kasinsinna, sakbay a maturog daytoy, nakitana pay ti biktima iti agarup alas 11 ti rabii idi Agosto 7, 2025.
Sakbay ti insidente, naobserbaranna a namin-adu a daras a nagsubli a simrek ken rimmuar iti kwarto ti biktima.
Naimatanganna pay a saan a gagangay ti garaw ti lalaki manipod iti regular a “routine” daytoy.
Iti panagimbestigar dagiti otoridad, nakakitada ti hand written suicide note a naisurat iti agarup walo a pidaso ti bond paper manipod iti kwartona.
Nakakabil sadiay a na-engaged ken naadik daytoy iti online gambling platform.
Nailumlum pay daytoy ti adu nga utang manipod kadagiti barkadana ken dadduma pay nga online lending applications.
Naiyuman metten daytoy kadagiti nagannak ti biktima.//Via Bombo Noveh Organo
