Sangapulo ket lima nga aldawen wenno nasurok a dua a domingon ti naglabas ngem saan pay a nasarakan dagiti otoridad ti bagi ti mapukpukaw a senior citizen a residente ti Sitio Talingoroy, Wangal, La Trinidad, Benguet.
Sigun kenni Police Lieutenant Colonel Zacarias Dausen,Chief of Police iti La Trinidad Municipal Police Station, full blast ita ti operasyonda para iti panakasarak ti nasao a lalaki nu sadino, nagturong dagiti searchers iti nakakonektaran ti Balili River.
Innayonna pay a nagaramat metten dagitoy iti maysa a makina a mabalin a mangdetect iti bagi manipod iti uneg ti danom.
Mainaig iti dayta, imbinglay ni PLtCol. Dausen a nakaawatda iti report manipod San Fabian, Pangasinan nga adda iti nasarakan a tumtumpaw a bagi rason a nagturong dagitoy sadiay.
Saanen a mabigbig ti bangkay idi nasarakan rason a nangala ti kapulisan iti sample daytoy para iti DNA test.
Kagiddan dayta, nangala metlaeng dagitoy iti sample para iti DNA test manipod iti anak iti mapukpukaw a senior citizen.
Manamnama met a rumwar kadagiti sumarsaruno a bulan ti resulta dagiti sample a maipasidong iti test.//Bombo Noveh Organo
