Pimmusay ti agtawen iti 18 a nangpaltog iti bukodna a bagi, kalpasan a pinaltuganna ti ex-girlfriendna iti unneg ti Sta. Rosa Integrated School idiay Nueva Ecija.
Malamlamayan ita ti bangkay daytoy iti pagtaenganda bayat a comatose paylaeng ti pinaltuganna a sigud a nobyana.
Maipalagip nga idi August 8, 2025 ket sinumrek ti 18-anyos a suspek iti unneg ti pagadalanda ken pinaltoganna ti agtawen iti 15 nga ex-girlfriend-na.
Sigun iti lolo ti Grade 8 a biktima, makinkanigid a paset ti ulo ti apona ti natamaan.
Maur-uray paylaeng ti operasion ti biktima, agsipudta kasapulan a maaddaan iti puot sakbay a maisayangkat ti operasion sigun kadagiti doktor.
Kabayatanna, naduktalan nga awan ti serial number ti paltog nga inaramat ti suspek.
Nupay kasta, impanamnama ni PMaj. Willard Dulnuan, Chief ti Sta. Rosa PNP a padasenda a sapulen no siasino ti nagalaan ti suspek iti nasao a paltog.
Gapu iti napasamak nga insidente, nangisayangkat ti Department of Education ken dagiti otoridad iti taripnong tapno pagsaritaanda dagiti posible a pannakapasayaat ti seguridad ti nasao a pagadalan.
