Posible a rumsua dagiti problema apaman a pormal nga agbalin a linteg ti Senate Bill No. 2816 wenno ti gakat a mangilaylayon iti term of office dagiti opiyales iti barangay ken sangguniang kabataan (Act Setting the Term of Office of Barangay Officials and Members of the Sangguniang Kabataan, and for other purposes).
Inlawlawag ti legal luminary a ni Atty. Edgar Avila nga addan iti kapada a kaso a napasamak kadagiti napalabas a tawen nu sadino, indeklara iti Korte Suprema nga unconstitutional ti panakaitantan iti eleksyon.
Daytoy ket babaen iti impila ni Atty. Romulo B. Macalintal a petisyon (G.R. No. 263590) a nangkarit iti constitutionality iti Republic Act 11935 wenno ti panakaitantan iti December 2022 Barangay and Sangguniang Kabataan Elections.
Malaksid iti panangideklara iti Korte Suprema nga unconstitutional ti RA 11935, inlawlawag ni Atty. Avila a nakalanad metlaeng iti desisyon nga awanan iti bileg ti Senado a mangitantan iti naituding nga eleksyon wenno mangilaylayon iti years of term dagiti opisyales iti barangay malaksid laeng nu adda iti constitutional amendment a mangipaay kadakuada iti bileg.
Sigun kenni Atty. Avila, posible manen a mangipila ni Atty. Macalintal iti petisyon a mangkarit iti constitutionality iti Senate Bill No. 2816 kaspangarigan matuloy ti ceremonial signing daytoy ita nga aldaw.
Kabayatanna,immuna metten a naipadamag a nakasaganan ni Atty. Macalintal a mangipila iti kaskenan a petisyon iti sangwanan iti Korte Suprema iti kabiitan a panawen a mangkarit iti constitutionality iti mapangpanggep a panakailaylayon iti term of office dagiti opiyales iti barangay ken sangguniang kabataan a mangitunda metlaeng iti panakaitantan iti December 2025 Barangay and Sangguniang Kabataan Elections.//Bombo Rob Dominguez
