Nasarakanen ti bangkay ti senior citizen kalpasan ti dandani tallo a lawas a search and retrieval operation dagiti otoridad ken volunteers.
Ti bangkay ni Nardo Diplat Cariño ket nakita idi kalman, Agosto 14.
Maipalagip a naipadamag a mapukpukaw daytoy idi Hulyo 25 idiay Sitio Talinguroy, Barangay Wangal, La Trinidad, Benguet kalpasan ti nagaburan iti nargaay a daga.
Nadiskobre ti bagi ti biktima idiay Bantogey, Banengbeng, Sablan, Benguet kalpasan nga inreport ni barangay tanod Sherwin Sholin kadagiti otoridad nga adda ti nakitana a bangkay a naipit iti sirok ti bato iti maysa a karayan.
Dagus met a nagresponde iti nasao a lugar ti nagtipon a pwersa ti La Trinidad MPS, Sablan MPS ken Benguet Provincial Forensic Unit (PFU), Sablan Bureau of Fire Protection (BFP), Sablan MLGU, Banengbeng BLGU, sibilyan ken maseknan a pamilya tapno ipatungpal ti retrieval operation.
Maibasar iti report, marunrunoten ti bangkay ngem nabigbig daytoy ni Epher Julian Cariño nga isu ti amana babaen iti buok ken kanawan a saka.
Maipatungpal met ti post mortem ken DNA examination tapno maduktalan ti rason iti ipupusay daytoy ken makumpirmar ti pakabigbigan daytoy.
