Ad-adalen paylaeng ti City Council ti sumaruno nga addang nga aramidenda nu mainayon, ma-revive, wenno ma-abolish ti Barangay Bagong Lipunan iti siudad ti Baguio.
Kasaruno ti naisayangkat a “session hearing in aid of legislation” idi kalman.
Iti pannakiuman ti Bombo Radyo kenni Atty. John Paul Martin, Election Officer ti Commission on Elections ti siudad ti Baguio, kinunana a daytoy ket gaputa awanan ti botante ken nabutosan nga opisial a kas ti kapitan, kagawad ken Sanguniang Kabataan ti nasao a barangay.
Sigun kenni Martin, duapulo a tawenen ti napalabas nga awanan ti opisial ti nasao a barangay.
Maibasar iti market code, naduktalan a karaman ti Barangay Bagong Lipunan iti disso a masakupan daytoy nu sadinno nakalanad a saan a mabalin nga agnaed kadagiti disso a sakop ti public market, a rason ti panangi-exlude ti gobierno kadagiti agnanaed iti nasao a barangay.
Nupay kasta, kinuna ni Martin a nainget ita a maad-adal ti nasao a banag iti City Council.
Kabayatanna, akseptaran latta ti Commission on Elections-Baguio dagiti indibidual nga agparehistro usar ti Barangay Bagong Lipunan kas barangay dagitoy la kitdi adda ti maiparang a pammaneknek a nagtaud dagitoy iti nasao a barangay gaputa karbengan dagitoy nga agparehistro
