Nangipaulog iti subpoena ti Commission on Elections (Comelec) kadagiti campaign donor da Senate President Francis “Chiz” Escudero at Senador Rodante Marcoleta kas paset iti imbestigasion iti mapapati a saan a panangireport kadagiti kontribusionda iti kampania.
Sigun kenni Comelec Chairperson George Garcia, mabalin a sungbatan iti sidong iti Omnibus Election Code dagiti donor ken contributo a saan a mangisubmitir iti report iti donasionda iti uneg iti tallo pulo nga aldaw kalpasan ti eleksion.
Ti nasao a panaglabsing ket adda ti pannusa a pannakaibalud iti maysa agingga innem a tawen.
Inlawlawag ni Garcia a numan pay multa laeng ti naipataw kadagiti kandidato a saan a mangideklara iti donor maibasar iti Republic Act No. 7166, agtaltalinaed nga election offense ti saan a panangireport dagiti donor ken contributor.
Immunan nga imbasura iti Comelec ti reklamo nga election offense kontra kenni Marcoleta gapu iti kinakurang iti ebidensia.
Nadalusan metlaeng ni Escudero iti kaso nga adda pakainaiganna iti P30 milion a campaign donation idi tawen 2022, numan makukuwestunar pay daytoy iti Korte Suprema.
Sumangsango metlaeng ni Escudero iti baro a reklamo seknan iti campaign donations.
