Inlawlawag ti Criminal Investigation and Detection Group (CIDG) a kiniddaw ti pamilya ni Senador Rodante Marcoleta a mapalubusan da Vice Presidente Sara Duterte ken Senador Robin Padilla a mangbisita iti senador.
Inlawlawag daytoy ni Police Colonel John Guiagui, Regional Chief, PNP-CIDG National Capital Region kalpasan nga inawagan ti Sandiganbayan dagiti police officials gapu iti panangipalubosda a mabisita ni Marcoleta iti baet nga isolated daytoy gapu iti pneumonia.
Sigun kenni Guiagui, kiddaw ti senador ken dagiti pamilyana a mabisita daytoy.
Innayon ti opisial nga adu dagiti mangkayat nga agbisita iti senador ngem ti bise presidente ken Sen. Padilla laeng ti pinatganda.
Kabayatanna, saan a sinongbatan ni Guiagui ti saludsud no apay a ti bise presidente ken Padilla laeng ti napalubusan.
Sigun iti opisial ti direktor laeng ti CIDG ti makasungbat iti daytoy.
Nakabalud ni Marcoleta iti Philippine National Police General Hospital (PNPGH) gapu iti P75-milion a plunder case mainaig iti saan a naideklara a donasionna iti 2025 National Election.
