Agpatpataming ita iti ospital ti maysa nga estudyante kalpasan a napalpaltogan iti ruar ti University of Abra-Main Campus sadiay Sitio Mapaloong, Brgy. Poblacion, Lagangilang Abra idi Agosto 22, 2025.
Nabigbig ti biktima a ni Prince Albert Barbosa, agtawen iti 18, agad-adal ken residente iti Sitio Masanad, Brgy. Libtec Dolores, Abra bayat a ti suspek ket ni Jave Talaga Bragas, agtawen iti 24, estudyante metlaeng iti kapada nga unibersidad, ken residente sadiay Calao Bucay, Abra.
Maibasar iti report, agarup 3:40 iti malem idi Agosto 22, 2025, nakaawat dagiti personnel ti Lagangilang Municipal Police Station iti shooting incident wenno pammaltog iti ruar ti nadakamat a pagadalan rason a dagus a nagresponde dagitoy.
Iti inisial nga imbestigasion, ti suspek ket addaan iti impluensia ti arak no sadino ditoy a kellaat a pinaltoganna iti namintallo a daras ti biktima kalpasanna, nagtalaw daytoy iti saan a nabigbig a direksyon a naglugan iti Raider 150 color Blue.
Dagus met a naitaray iti ospital ti biktima iti Abra Provincial Hospital para iti medical treatment, bayat a madama pay laeng ti manhunt operation para iti posible a pannakatiliw ti suspek.
