Impetteng ni Department of Public Works and Highways Secretary Manuel Bonoan a ti P114 million a rocknetting project idiay Camp 5, Kennon Road, Tuba, Benguet nga immunan nga ininspect ni President Ferdinand Marcos Jr idi kalman ket posible a naaramid bayat ti naglabas nga administrasyon.
Iti panag-inspect ni Bonoan iti nasao a proyekto ita nga aldaw, kinuna a dagiti naaramid a rock netting project iti sidong ti liderato daytoy ket dimmalan iti umno a proseso.
Innayonna a dagiti maar-aramid a rock netting project bayat ti panagtugawna kas sekretarya ti DPWH ket adda ti technical investigation a naipatungpal ken dagiti materyales a maaramat ket aprobado ti Bureau of Design sakbay a maramid.
Immunan a kinuna ni President Marcos a useless dagiti rocknetting project idiay Kennon Road ngem inlawlawag met ni Bonoan a dagiti rock netting project ket maar-aramat kadagiti bantay gapu ta agserserbi daytoy kas technical engineering solution para iti stabilization dagiti slopes.
Nupay kasta, impaganetgetna a dagiti rock netting projects ket masapul a maipasidong iti nainget a panagadal sakbay ti konstruksyon daytoy.
