Kinumpirmar ni Department of Justice (DOJ) Secretary Jesus Crispin Remulla nga immannugot ni sigud a Philippine Charity and Sweepstakes Office (PCSO) general manager Royina Garma nga agtestigo iti prosekyusyon ni sigud a president Rodrigo R. Duterte iti International Criminal Court (ICC).
Sigun kenni Remulla,nakaalada iti impormayon seknan iti panagawid ni Garma iti pagilian rason nga inurayda daytoy.
Gapu ta awan pay ti naipaiyulog a warrant of arrest kontra kenni Garma, naibilang laeng daytoy kas subject iti Immigration Lookout Bulletin Order wenno ILBO.
Ni Garma ket nagturong idiay Malaysia tapno makipagkita kadagiti ICC kasaruno ti panakaideportna iti Pilipinas manipod Estados Unidos a saan nga immannugot iti kiddaw daytoy a political asylum.
Inlawlawag ni Remulla a gapu ta agbalin a maysa a testigo ni Garma iti nasao a tribunal, paset iti working relationship ti Pilipinas ken ICC ti witness protection.
Patien ni Remulla a ti kasayaatan a wagas tapno maprotektaran ti nasao a witness ket babaen iti panakipagkitana kadagiti opisyales iti ICC gapu ta posible a maaddaan ti pangta iti biag ken seguridadna nu adda iti Pilipinas.
Maipalagip nga imbutaktak ni Garma a binilin daytoy ni sigud a president Rodrigo Duterte a mangsapol iti opisyal a mangiyimplimintar iti Davao model a drug war iti intero a pagilian.
Inladawan ni Garma a ti maaw-awagan a Davao model ket sistema nu sadino,addaan daytoy kadagiti bayad ken reward.
Kabayatanna, inlawlawag ni Remulla nga iti baet a maprotektaran ni Garma kas testigo iti ICC, saan latta nga abswelto daytoy kadagiti daduma pay a kaso a sangsangwenna pakairamanan ti maatap a pakainaiganna iti ipupusay daydi PCSO board secretary a ni Wesley Barayuga idi 2020.
