Imbutaktak ni Baguio City Mayor Benjamin Magalong ti mapapati nga iregularidad iti panakaipatungpal kadagiti flood control projects iti Pilipinas.
Iti panakiuman ti Bombo Radyo kenkuana, kinunana a sakbay a mangrugi ti bidding procurement, addan dagiti naituding a mangabak iti daytoy.
Kinunana pay nga adda dagiti opisyal nga agkidkiddaw iti kondisyon no sadino ti umuna a makaipaay iti kadakkelan a gatad ken advance payment ket daytoy ti sigurado a maipaayan iti proyekto.
Kagiddan dayta, pinaglibakan metlaeng ti mayor ti agwarwaras a damag a daytoy ti pinili ni President Ferdinand Marcos Jr., kas miyembro ti independent commission a mang-imbestigar iti naanomalyaan a flood control projects.
Innayonna a saan daytoy a kwalipikado kalpasan nga inlawlawag ti Malacañang nga awan ti politiko ti mainayon iti nasao a komisyon.
