--Ads--
Rugyan ita nga aldaw iti Department of Public Works and Highways (DPWH) ti mangisimpa kadagiti nadadael nga imprastraktura iti amianan a Cebu gapu iti magnitude 6.9 a gingined.
Sigun kenni DPWH Secretary Vince Dizon, dumanon iti P2.5 billion ti balor dagiti nadadael a kalsada ken rangtay malaksid pay kadagiti daduma a pasdek kas kadagiti pagadalan ken pagagasan.
Maibasar iti kaudian a datos manipod iti National Disaster Risk Reduction and Management Council, pakabuklan a 713 nga imprastraktura iti Centra Visayas ti dinadael ti gingined malaksid pay kadagiti 18,154 a babbalay.
Kabayatanna, maibasar met iti kaudian a datos, dumanon metten iti 73 dagiti indibidwal a pimmusay bayat a 559 dagiti nadangran.
